मेरो सूर्य

आजकल म बिहान सबेरै उठ्छु
र पस्छु आफ्नै मन भित्र
किनभने मेरो सूर्य त आजकल
मेरो मन भित्रबाट उदाउँछ,
हो मेरो सूर्य
उदाउँछ मेरो मन भित्रबाट
कहिले उज्यालो भएर
मलाइ पनि झलमल्ल पार्दै,
कहिले कुन्नि के को पिरले हो
धुम्म परेर उदाउँछ
मैलाइ पनि घुर्मैलो पार्दै,
अनि कैले चाहि
कुन्नि के ले छेकेर हो
अध्यारो भएर उदाउँछ
मलाइ समेत रात पार्दै,
हो मेरो सूर्य मेरो मन भित्रबाट उदाउँछ,

भन्छौ भने
सूर्य त ऊज्यालो उदाउँछ
अहँ! मेरो मनको सूर्य एकनास उदाउँदैन
यो त कहिले उज्यालो,कहिले घुर्मैलो र कहिले कालो उदाउँछ,
मेरो सूर्य उज्यालो उदाउँछ
मलाइ हँसिलो पार्दै,
मेरो सूर्य घुर्मैलो उदाउँछ
मलाइ अध्यारो बनाउँँदै,
अनि मेरो सूर्य कालो उदाउँछ
मलाइ मृततुल्य पार्दै,
हो मेरो सूर्य एकनास उदाउँदैन

मेरो मनको सूर्य आकाशको सूर्य झै
गोलो मात्र उदाउँदैन
यो त लाम्चो,थेप्चो,नेप्टो र चुच्चो पनि उदाउँछ
मेरो मनको सूर्य आकाशको सूर्य झै
रापिलो मात्र उदाउँदैन,
यो त चिसो, चिसो र बरफ चिसो पनि उदाउँछ
मेरो मनको सूर्य आकाशको सूर्य झै
हँसिलो मात्र उदाउँदैन
यो त रून्चे अनि रून्चे पिन्चे पनि उदाउँछ

यसरी मेरो मनको सूर्य
भिन्न भिन्न उदाउँछ
र लैजान्छ मलाइ पनि भिन्न भिन्न लोकमा
मानौ यो मेरो सारथी हो,
मनको घोडा नियन्त्रण गर्ने,
कहिले बेगले कुदाउँछ, कहिले सुस्त
मानौ धेरै हतारोमा छ र साह्रै फुर्सदमा पनि
कहिले मृदु कुदाउँछ,
जस्तै स्वप्न बँगैचाको सयरमा होस्
अनि कहिले क्रुर कुदाउँछ
लाग्छ कुनै युद्ध मैदानमा खटिएको योद्धा होस्,
हो,यसरी मेरो सूर्य भिन्न भिन्न उदाउँछ
मलाइ नै प्रतिबिम्बित गर्दै ।